សូស្តីប្រិយមិត្តជាទីស្រឡាញ់ យើងទាំងអស់គ្នាពិតជាសំណាងណាស់ដែលមានជីវិតរស់នៅជាមួយគ្នាលើភពផែនដីនេះ។ កំណើតដែលយើងកើតមកលើផែនដីតែមួយ ក៏ប៉ុន្តែទីកន្លែងកើតគឺខុសគ្នាឆ្ងាយណាស់ហេតុនេះការលូតលាស់នៃរូបរាងកាយរបស់យើង ក៏មានលក្ខណៈខុសៗគ្នាដែរទៅតាមតំបន់ដែលយើងរស់នៅ។ សម្រាប់ចិត្តគំនិតរបស់យើង ក៏គ្មាននរណាម្នាក់អាចគិតស្មានដឹងដោយងាយៗនោះទេ សូម្បីតែខ្លួនយើងក៏មិនអាចដឹងបានគ្រប់ជ្រុងជ្រោយនោះដែរ។ ចូរយើងទាំងអស់គ្នាគិតថា មុនពេលដែលយើងស្គាល់គ្នាជួបមុខគ្នា និយាយជាមួយគ្នា តើយើងបាននៅទីណា? ហើយចុះហេតុអ្វីបានជានៅពេលនេះយើងស្គាល់គ្នាទៅវិញ?
ហេតុនេះហើយទើបធ្វើឲ្យខ្ញុំផុសគំនិតមួយឡើងសួរខ្លួនឯងថា “ដំណើរជីវិតឆ្ពោះទៅរកសុភមង្គលគឺជាអ្វី?”គួររំឮកថា ខណៈដែលយើងទាំងអស់គ្នាបើកនេត្រាមើលពន្លឺព្រះអាទិត្យជាលើកដំបូង តើយើងដឹងថាជីវិតគឺជាអ្វី? លើលោកនេះមានអ្វីខ្លះដែលយើងមិនបានដឹង មិនបានស្គាល់? អ្វីៗដែលយើងបានដឹងនៅពេលនេះគឺយើងពិតជាដឹង តែអ្វីៗដែលយើងដឹងពីអតីតកាលគឺយើងពិតជាមានការភេ្លចភ្លាំង ហើយអ្វីៗដែលកើតមាននៅក្នុងពេលអនាគត គឺយើងអាចស្មានដឹងខ្លះៗតែប៉ុណ្ណោះ។ ហេតុនេះចូរយើងកុំគិតថា អ្វីដែលយើងធ្វើវាពិតជាងាយស្រួលឲ្យសោះ យើងដឹងទេពាក្យសម្តីដែលយើងនិយាយគឺវាងាយស្រួលណាស់ ប៉ុន្តែកុំភ្លេចថាការអនុវត្តវាប្រហែលជាមិនសូវមានភាពងាយស្រួលប៉ុន្មានទេ។ ដំណើរជីវិតកាលពីអតីតកាលគឺវាមានសភាពខុសប្លែកគ្នាឆ្ងាយសែនឆ្ងាយធ្វើឲ្យយើងនឹកស្មានមិនដល់ ជាក់ស្តែងបើយើងគិតនោះគឺពិតជាដឹងនូវកំហុសជាច្រើនដែលយើងបានប្រព្រឹត្ត តែវាមិនថ្វីនោះទេព្រោះយើងដឹងថា គ្មាននណាមា្នក់ កើតមកទទួលបានភាពជោគជ័យល្អឥតខ្ចោះនោះទេ។ ពាក្យថាជោគជ័យគឺកើតឡើងបានដោយសារតែកំហុសដែលជាភាពបរាជ័យរបស់យើង ដូច្នេះចូរកុំនឹកតូចចិត្តឬសោកស្តាយស្តីបន្ទោសឲ្យខ្លួនឯងឲ្យសោះ យើងត្រូវពង្រឹងស្មារតីខ្លួនឯង លើកទឹកចិត្តខ្លួនឯង អប់រំខ្លួនឯងជារឿយៗឲ្យ ប្រព្រឹត្តតែអំពីល្អជាកុសល ជួយគ្រួសារ និងសង្គមជាតិរបស់យើង។ ហើយយើង ត្រូវមានគំនិតកែច្នៃកំហុសខ្លួនជាសំខាន់ កុំបណ្តែតបណ្តោយឲ្យសោះ ដើម្បីឈានទៅរកភាព ជោគជ័យក្នុងពេលអនាគត។ ដោយឡែកពេលនេះយើងគឺស្ថិតនៅក្នុងពេលបច្ចុប្បន្នកាល យើងបានធ្វើអ្វីខ្លះហើយដើម្បីជួយខ្លួនឯង ជួយគ្រួសារ និងជួយសង្គមជាតិ។ បើសកម្មភាព របស់យើងមានភាពខ្វះខាតចូរយើងចាប់ផ្តើមគិត ហើយអនុវត្តន៍សារជាថ្មីថាគួរធ្វើបែបណា។
ខ្ញុំគិតថាពាក្យដំណើរជីវិតមួយឃ្លានេះ គឺវាមានទាំងពាក្យឈឺចាប់ សុខស្រួលគ្រប់សព្វបែបយ៉ាងដែលយើង មាន។ តើពេលអនាគតអ្នកនឹងធ្វើអ្វីខ្លះដើម្បីជាប្រយោជន៍ចំពោះខ្លួនឯង ចំពោះគ្រួសារនិងចំពោះសង្គមជាតិ? វាមិនមានអ្វីដែលជាការលំបាកនោះទេចំពោះបុគ្គលដែលគិតថាអាច និងមានការព្យាយាមអំណត់អត់ធន់ នោះ។ ហេតុនេះហើយទើបមានទស្សនៈ មួយលើកឡើងថាៈ ជោគជ័យកើតឡើងពីការមិនបោះបង់ ហើយបរាជ័យគឺកើតមានឡើងដោយសារតែការបោះបង់។ ចំពោះហេតុផលទាំងអស់នេះតើយើងអាចគិត និងអនុវត្តន៍បានទេ ក្នុងនាមយើងជាបុគ្គលម្នាក់ដែលរស់នៅក្នុងសង្គម។ ពិតណាស់កើតជាមនុស្សស្គាល់គ្នា រៀនរស់ជាមួយគ្នា គឺដាច់ខាតត្រូវតែចេះស្រឡាញ់ ចេះចាប់យក ហើយក៏ចេះលះបង់ផងដែរ ផ្តល់ឱកាសដល់ខ្លូនឯង និងអ្នកដ៏ទៃដើម្បីរស់ស្រួលជាមួយគ្នាលើពិភពលោកនេះ។ ជាចុងក្រោយខ្ញុំសូមជូនពរដល់មិត្តទាំងអស់គ្នាឲ្យចេះមានចិត្តអាណិតអាសូរគ្នា យោគយល់គ្នា ជួយគ្នាទៅវិញទៅមក ក្នុងគ្រាដែលមិត្តយើងណាម្នាក់មានគ្រោះអាសន្ន ដើម្បីជាភាពសុខសាន្តនៅក្នុងសង្គមទាំងអស់គ្នា ហើយក៏សូមឲ្យប្រិយមិត្តទាំងអស់បានសម្រេចបំណងប្រាថ្នាគ្រប់បែបយ៉ាងដែលជាគោលដៅរបស់អ្នកផងដែរ។ សូមអរគុណ!!! -
.jpg)
0 comments:
Post a Comment